تفتح الجريدة.. من أولها لي آخرها أخبار تعور القلب..
تصكر الجريدة وتقول "ياريتني مافتحتها "
..
يقعد بالدوانية..يدور الحديث حول الجرايم اللي يتداولها الناس بكل الدوانيات ..
"سمعتوا عن اللي ذبحت معزبتها يقولون ناحرتها" !!
يطلع من الدوانية مهموم اكثر من أول..!!
تقعد مع صديقاتها.. "شفتوا فلانة تطلقت .. الريايل مالهم امان"..!!
سمعت هالكلام وايد لين ما تعقدت..!!
يفتح التلفزيون.. "اخبار التاسعة" .. ايران تهدد و امريكا تتوعد و الخليج بين السندان والمطرقة..!!
يقضي ليلة وسواس و كوابيس
أتوقع هذا اللي صاير معاكم كلكم..!! الأخبار السلبية تلاحقنا من مكان لي مكان.. قمنا نظن ان الدنيا مافيها خير.. و مابقى بالناس طيب !!
" الدنيا تخرع" الاوضاع صعبة..الجرايم زادت .. هذي نهاية الدنيا..!!
يكفي الهموم والمشاكل اللي كلت قلوبنا.. ييون يزودونا هم على هم
أدري أدري.. بس مابي أسمع أكثر من جذي..!!!
بس أبشركم ... الدنيا بخيــــــــــــر
" بشروا .. ولا تنفروا "
صدق رسول الله صلى الله عليه وسلم
في هذا القسم ستكون مواضيعي ايجابية فقط ،، ببتعد عن كل المواضيع السلبية اللي تزيدنا هموم وغثى..
كفاية تشاؤم.. كفاية ذم .. كفاية ندور زلات غيرنا
بنقل لكم اخبار تفتح النفس. تعيد الامل و الراحة في قلوبنا .. تونسنا وتخفف حراتنا..
الحياة مثل الشجرة تعطينا ثمر يانع وثمر خربان.. ليش ما نتكلم عن الزين كثر مانتكلم عن الشين..
هذي فكرة قسم "أبشركم" و المرة الياية نطروني بمواضيع كلها بشاير ..
مبارك عليكم الشهر وعسى الله يجعلنا من اهل الجنة..
:)
التسميات: أبشركم
